Wat beteken Stroom-op?

Toe ek moes besluit het oor `n naam vir my blog het ek baie gedink oor wat gepas sal wees vir die artikels wat ek hier wil deel. Die artikels wat ek hier wil deel is alles oor ons leefwyse teen en sienswyse van hierdie wêreld en ook oor ons geloof in Jesus Christus. 

Die Bybel se dat ons in hierdie wêreld is, maar nie van hierdie wêreld is nie. Dit beteken dat ons hier in dié wêreld bly, maar dat ons nie soos die wêreld moet leef nie.

Om stroom-op te lewe beteken om teen die wêreld te leef. Wanneer die wêreld iets navolg is dit wys om eerder die Bybel te volg al beteken dit dat die pad moeiliker sal wees.

Om stroom-op te lewe beteken teenkanting van die wêreld. Self mense wat hulself Christene noem sal jou leefwyse en geloof bevraagteken of selfs aflag as iets simpels.

Om stroom-op te lewe beteken dat die wêreld nie jou leefwyse sal verstaan nie of enigsins `n poging sal aanwend om jou te probeer verstaan nie.

Die Bybel sê in 1Joh 2:5

“Moenie die wêreld liefhê of die dinge wat in die wêreld is nie. As iemand die wêreld liefhet, dan is die liefde van die Vader nie in hom nie.”

Hierdie wêreld en alles daarin is deur God geskape. Ons moenie die die dinge van hierdie wêreld liefhê nie, want eerstens gaan dit net hier agterbly as jy doodgaan, tweedens kan dit `n struikelblok wees vir jou geloof om te groei en laastens kan dit veroorsaak dat ons heeltemal die Bose en sy dinge begeer as om die Skepper te volg.

Ons leef stroom-op deur:

• ·        In Jesus Christus te glo;

• ·        `n wedergebore lewe te probeer lei;

• ·        God se gebooie te wil gehoorsaam(Sabbatdag te onderhou, Huwelikbeloftes te onderhou);

• ·        God se opdragte te probeer doen( vrugbaar wees, die aarde bewaar, evangelie te verkondig)

• ·        Nie die feeste te vier wat die wêreld vier nie (paasfees,kersfees,halloween,valetynsdag,verjaarsdae);

• ·        Nie die gewoontes van die heiden nasies aan te leer nie      (ons liggame te verniel deur tattoos en “piercings”, afgode as versierings);

• ·        Ons kinders te wil grootmaak met God se Woord as ons maatstaf eerder as sielkundiges;

• ·        te glo God is die een wat genees en die allopatiese middels nie `n wonderkuur is nie;

• ·        beskeie aan te trek(om nie ons medemens te laat struikel met ons kleredrag nie);

• ·        die huweliksbelofte te eerbiedig en leiding by God te vra   (wag vir die huwelik voor jy saambly en ander dinge doen);
• finansies aan God oor te laat (betaal tiendes,koop nie halaalprodukte nie, leef spaarsamig en gaan geen skuld aan nie )
• nie die verbruikerkultuur te volg nie en eerder alles self te maak en hergebruik.

Hierdie is nie `n volledige lys nie, maar dis `n goeie vertrekpunt.  As jy die dinge op die lysie volg, kan jy maar vir seker weet dat jy teenkanting in hierdie wêreld gaan kry. 

Jesus sê in Joh 15:20 :

“Onthou die woord wat Ek vir julle gesê het: “`n Dienskneg is nie groter as sy heer nie. As hulle My vervolg het, sal hulle jul ook vervolg....”

Ons moet teenkanting verwag en dis reg so. Die duiwel sal jou nie pla as jy nie teen hom werk nie. Mag God se woord `n lamp vir ons voet en `n lig vir ons pad wees in hierdie donker wêreld en mag God se lig deur ons skyn.

Groete MammaS